विराटनगर । नेपाल खेलकुद महासंघ (नेकोस) राष्ट्रिय एथलेटिक्स संघले मदन भण्डारी सडक दौड प्रतियोगिता आयोजना गर्ने भएको छ ।
आज विराटनगरमा संघले पत्रकार सम्मेलनको आयोजना गर्दै प्रतियोगिताबारे जानकारी दिएको हो । असार १९ गते विराटनगरमा आयोजना हुन लागेको ५ किलो मिटर खुल्ला पुरुष तथा महिला दौड प्रतियोगितामा देश भरिबाट ३ सय ५० जनाको सहभागिता रहने नेकोस राष्ट्रिय एथलेटिक्स संघको केन्द्रीय अध्यक्ष अनिरुद्र चौधरीले बताउनु भयो ।
मदन भण्डारीको ७३ औ जन्मजयन्तीको अवसरमा आयोजना गर्न लागेको खुल्ला पुरुष तथा महिला दौड प्रतियोगितामा प्रथम हुनेले १५ हजार १ सय ११ रुपैयाँ, दोस्रो हुनेले १० हजार १ सय ११ रुपैयाँ, तेस्रो हुनेले ७ हजार १ सय ११, चौथो हुनेलाई ५ हजार १ सय ११ र पाँचौं ३ हजार १ सय ११ रुपैयाँ पुरस्कार प्रदान गरिने छ ।
त्यसै गरि १५ वर्ष मुनिका छात्रछात्राहरुको लागि ३ किलो मिटर दौड प्रतियोगितामा प्रथम हुनेले ८ हजार १ सय ११ रुपैयाँ, दोस्रो हुनेले ६ हजार १ सय ११, तृतीय हुनेले ४ हजार १ सय ११, चौथो हुनेले २ हजार १ सय ११ र पाँचौ हुनेले १ हजार १ सय ११ रुपैयाँ पुरस्कार पाउने छन । प्रतियोगिता १९ गते बिहान सवा ७ बजे सहिद रंगशालाबाट सुरु हुने आयोजकले बताएको छ ।